INILABAS na ng Samahang Basketbol ng Pilipinas (SBP) kahapon, Hulyo 7, ang opisyal na listahan ng mga napiling maglalaro sa 2023 FIBA U16 Women’s Asian Championship na gaganapin mula Hulyo 10-16 sa Amman, Jordan.
Sa pangunguna nina Ava Fajardo at Ryan Nair, muling sasabak ang koponan laban sa 16 na teams upang makakuha ng slot sa kani-kanilang dibisyon. Siyam na koponan ang nasa Division A habang walo naman sa Division B.
Sina Fajardo at Nair ay naging bahagi ng koponan na nakakuha ng ikatlong pwesto sa paligsahan noong nakaraang taon matapos mabigo sa semifinals kontra Samoa, na siyang naging champion sa kanilang dibisyon.
Sa pangunguna ni Coach Patrick Aquino, kabilang sa listahan sina Demicah Arnaldo, Sophia Canindo, Isabella De Jesus, Ariel De La O, Scarlett Mercado, Alyssia Palma, Naima Navarro, Ma. Christina Lapasaran, Kimi Sayson at Nevaeh Smith.
Ang Pilipinas ay nasa Division B Pool A kasama ang Hong Kong, Maldives at Jordan na nakatakda nilang labanan sa Hulyo 10-12, ayon sa nabanggit. Samantala nasa Pool B naman ang Malaysia, Iran, Singapore at Guam.
Ang Division B ng FIBA Women’s Asia Championship ay binubuo ng walong koponan na hahatiin sa dalawang grupo, Pool A at Pool B. Kung saan ang mangunguna sa bawat grupo ay siyang aabante sa semi-finals, habang ang pangalawa at pangatlo ay maglalaban naman para sa isang qualification process.
Mabigat ang kumpetisyon sa Division B dahil kung sino ang pinaka-aangat na koponan ay may pagkakataon sa isang promosyon: ang mapabilang sa Division A.
Ang U16 Asian Women’s Championship ay pinagtibay ang sistemang promotion-relegation noong 2017, kung saan ang mga koponan ay kinakailangan na magpakitang-gilas dahil isang team lamang ang may tiket patungo sa kabilang dibisyon.
Gayunpaman, matindi rin ang bakbakan sa Division A na kinabibilangan ng siyam na koponan gaya ng Australia, South Korea, Chinese Taipei, Thailand at Syria sa Pool A; at China, Japan, New Zealand at Samoa naman sa Pool B.
Kung saan sa huli, ang top four teams sa bawat pool ay may pagkakataong lumaban sa semi-finals, at magiging kinatawan sa FIBA U17 Women’s Basketball World Cup 2024 sa Mexico.
