PRANGKA at walang pag-aatubili.
Ganito planong gampanan ni Sen. Ronald Bato Dela Rosa ang kanyang magiging papel bilang miyembro ng panel at resource person sa papalapit na imbestigasyon ng Senado kaugnay ng drug war ng administrasyong Duterte.
Gaganapin ngayong Lunes (Okt. 28) ang naturang pagdinig sa pamumuno ni Senate Minority Floor Leader Koko Pimentel sa ilalim ng Blue Ribbon Committee, kung saan ay handang harapin ng dating PNP Chief ang mga kapwa mambabatas upang mailahad ang katotohanan taliwas sa mga paninira laban sa nakaraang administrasyon.
