Mga dahilan sa pagbaba ng inflation sa 2.1% mula sa 2.9%

BIGLANG bumagsak ang year-on-year (YOY) inflation sa 2.1% noong Pebrero 2025 mula sa 2.9% noong nakaraang buwan. Ano-ano ang mga nag-ambag dito? Patuloy kaya ang planong pagbaba ng interest rates ng Bangko Sentral ng Pilipinas (BSP)?

Bumulusok pababa sa 2.1% ang YOY inflation sa ikalawang buwan ng 2025 kahit hindi gumalaw  ang month-on-month (MoM) inflation. Ito ang pinakamababang antas simula noong Oktubre 2024 (Table 1)

Ang pagbulusok ay naranasan sa lahat ng sektor — sa  pagkain at iba pa (non-food). Bumaba ang YOY inflation ng pagkain mula sa 4.0% sa 2.6%. Nagsimula nang makabawi ang mga sakahan at palaisdaan sa mga pagkasira noong mga bagyo noong nakaraang taon.

Bumaba ang bigas sa -4.9%, ang pinakamababa nitong YOY inflation simula noong Agusto 2023. Itoý dahil sa pagtaas ng suplay na galing sa importasyon na lalong pinabagsak ng pagbaba ng taripa. Sinabayan ito ng pagbaba ng YOY inflation ng gulay sa 7.1%, isda sa 2.9%, at asukal sa -1.2%. Sa kabilang dako, umakyat ang YOY inflation ng karne sa 8.8% dahil sa pananalasa ng African swine fever  at gatas sa -1.2% na sumasalamin sa presyo ng importasyon.

Bumaba rin ang YOY inflation ng non-food items mula sa 2.2% sa 1.7% dahil sa pagbagsak ng presyo ng langis sa pandaigdigang merkado. Bumaba ang clothing and footwear (2.1% mula 0.3% noong nakaraang buwan), housing, water, electricity, gas and fuels (1.6% mula 2.2%) at household furnishings and maintenance (2.3% mula 2.6%).  Bumaba rin ang health (2.3%) at transport (-0.2%) ngunit umakyat nang bahagya ang information and communication (0.3%).

Lumagapak ng 6.0% ang presyo ng Dubai crude oil noong Pebrero sa  $76.32 kada bariles mula sa  $81.18 noong Pebrero 2024.  Bumaba rin ang presyo nito kumpara sa $80.18 noong Enero 2025.   Itoý dahil sa kinatatakutang recession sa United States (USA) na nagbabadya mula sa mga palisiya ni Pangulong Trump gaya ng pagtaas ng taripa sa mga malalaki nitong trading partners at ang pagsasara ng maraming upisina ng pamahalaan.  Patuloy din ang paghina ng demand ng China na naapektuhan ng pagbagsak ng GDP growth nito. Nagdesisyon din ang mga miembro ng OPEC na palaguin ang produksyon ng langis. Maaari ding bumalik ang Russia sa pandaigdigang merkado dahil sa posibleng pagtatapos ng giyera ng Russia at Ukraine na isinasaayos ngayon ng USA. Ito ang mga dahilan kung bakit sa Dubai oil futures market na naireport sa Platts, pababa sa $66.25/bariles ang quotes sa presyo nito sa Hunyo 2025.

Nanatili ang MoM inflation sa 0.5%.  Bumaba ang MoM inflation ng pagkain sa -1.0% mula sa 1.3% dahil sa -12.4% na pagbulusok ng presyo ng gulay, -1.6% na pagbaba ng presyo ng bigas at di natinag na presyo ng gatas. Ngunit umakyat ang presyo ng karne ng 3.2% at asukal ng 0.3%.

Sa non-food category naman,  nanatili ang MoM inflation sa 0.2% ng dalawang buwan mula sa 0.4% noong Disyembre.  Nag-ambag dito ang patuloy na pagdapa ng transport sa 0.1% mula sa 0.2%. Nagnormalisa ang housing water, electricity, gas and other fuels na bumaba sa 0.2% mula sa 0.1%. Ganoon din ang clothing and footwear (0.2%); health (0.2%);  information and communication (0.1%); at ang furnishings, household equipment, and routine maintenance (0.2%) na di gumalaw sa mga antas nila noong nakaraang buwan.

Dahil ang naitalang inflation ay nasa lower end ng target inflation range na 2-4%, inaasahang itutuloy ng BSP ang planong pagtapyas  sa interest rates sa ikalawang quarter ng taon. Ang mild na La Niña sa unang kalahati ng 2025 ay inaasahang magiging maganda sa agrikultura at tutulong sa pagbaba ng presyo ng pagkain. Inaasahan ding hihina ang mga ekonomiya sa mga advanced countries gaya ng USA at EU (European Union) dahil sa trade war at palitan ng tariff increases na siyang magpapadapa sa presyo ng langis na nababanaagan na ngayon sa direksyon ng presyo nito sa futures market.