SINIMULAN ng Pamahalaang Lungsod ng Muntinlupa ang Kapaskuhan sa pamamagitan ng Christmas Tree Lighting Ceremony na ginanap nitong weekend.
Tampok sa seremonya ang 45-talampakang Christmas tree na may 3-talampakang bituin at 20 talampakang diyametro.
Ang puno ay gawa sa bakal at pinalamutian ng mga garland, Christmas balls, at resin decors.
Nagningning ito sa mga Christmas light bulbs at pixel light bulbs.
Nagdaos din ng mga pagtatanghal ang mga lokal na choir mula sa Pamantasan ng Lungsod ng Muntinlupa, Colegio de Muntinlupa, Tunasan National High School, Muntinlupa National High School, at Muntinlupa Science High School.
Dumalo sa okasyon sina Congressman Jimmy Fresnedi, mga konsehal ng lungsod, mga hepe ng departamento, at mga empleyado ng city hall.
Natapos ang gabi sa isang magarbong fireworks display.
Sa kanyang mensahe, sinabi ni Mayor Ruffy Biazon, “Ang seremonyang ito ng pag-iilaw ng Christmas tree ay tanda ng pagsisimula ng ating mga kapaskuhang pagdiriwang. Ito ay sumisimbolo ng pag-asa, pagkakaisa, at kasiyahan ng panahon. Ibahagi natin ang liwanag at init ng Pasko sa buong Muntinlupa.”
Dagdag ni Congressman Jimmy Fresnedi, “Ang pagdiriwang na ito ay isang paalala ng ating pagkakaisa bilang isang komunidad. Nawa’y magpatuloy ang diwa ng Pasko sa bawat tahanan at puso ng bawat Muntinlupeño.” (GLG/PIA-NCR)
Mga larawan mula sa Muntinlupa PIO
