MATAPOS ang ilang pagdinig, pinayagan na nitong Martes ng Senate Committee on Women sa pangunguna ni Chairwoman Risa Hontiveros ang hiling na executive session ni dating Bamban mayor Alice Guo na nangakong maghahayag ng ilan pang detalye kabilang na ang pagkakakilanlan ng mastermind sa likod ng mga POGO-related crimes sa bansa.
Bahagi rin ng imbestigasyon ay ang binasang testimonya ni Sen. Bato laman ang panawagang public apology ng Council of Chiefs mula kay Pagcor Senior Vice President Raul Villanueva kaugnay ng “raw information” hinggil sa ‘di umano’y dating PNP Chief na sangkot sa pagtakas ni Alice Guo at pagtanggap ng payroll mula sa dating alkalde. Tumugon naman ang Pagcor official na nagbigay linaw at humingi ng paumanhin sa mga dating opisyal na nakaladkad sa naturang isyu.
