Ang mga pagsisikap na protektahan ang mga manggagawang Pilipino at wakasan ang child labor ay nakatanggap ng malaking suporta mula sa mga gobyerno ng Pilipinas at Canada, kung saan inilunsad ang isang bagong proyekto noong Agosto 6 sa Quezon City.
Tinawag na “Strengthening Freedom of Association and Action against Child Labor in the Philippines,” ang proyekto ay tatakbo mula 2024 hanggang 2029. Layunin nitong palakasin ang kalayaan ng mga manggagawa na mag-organisa at labanan ang child labor sa bansa.
Ang limang taong proyekto ay ipapatupad ng International Labor Organization (ILO) at pinondohan ng Employment and Social Development Canada (ESDC).
Kabilang sa mga piling katuwang sa proyekto ay ang Bureau of Labor Relations (BLR) at ang Bureau of Workers with Special Concerns (BWSC) ng Kagawaran ng Paggawa (DOLE). Ang mga ahensyang ito ay mangunguna sa pagpapatupad ng mga bahagi ng proyekto tungkol sa kalayaan sa pag-oorganisa at labansa child labor.
Sa kanyang mensahe, ipinahayag ni Kalihim ng Paggawa Bienvenido Laguesma ang kasiyahan sa pagkakaroon ng suporta mula sa mga katuwang sa lipunan para matiyak ang napapanatiling pag-unlad na walang maiiwan.
“Umaasa kami na ang mga inisyatiba sa proyektong ito ay magbibigay ng malaking ambag sa aming pagsisikap na suportahan ang Philippine Program Against Child Labor (PPACL) at matupad ang mga layunin ng Freedom of Association (FOA) roadmap,” ani Kalihim Laguesma.
Ang pagtutok sa kalayaan sa pag-oorganisa ay bunga ng mga rekomendasyon ng ILO High-Level Tripartite Mission sa Pilipinas noong 2023. Ang mga inisyatiba ng proyekto ay makakatulong na mapabuti ang kalayaan at karapatan ng mga manggagawa na mag-organisa.
Layunin din ng bagong proyekto na tumulong sa pagbangon ng PPACL mula sa epekto ng Covid-19 pandemic, na nagpabagal sa pag-unlad ng pagbawas sa child labor.
Ipinahayag ng Kalihim ng Paggawa ang kanyang pag-asa na ang paglulunsad ng proyekto ay magiging mahalagang hakbang sa karagdagang pagtataguyod ng mga karapatan sa paggawa at pag-aalis ng child labor sa bansa.
“Hangad ko na ang pormal na paglulunsad ng proyekto ay maging unang malaking hakbang tungo sa pagkamit ng isang Pilipinas na walang child labor kung saan ang FOA ay iginagalang at maingat na pinangangalagaan para sa kapakinabangan ng mga manggagawa at ng buong bansa,” ayon kay Laguesma.
Kasama ni Kalihim ng Paggawa sa paglulunsad ng proyekto sina Undersecretary Benjo Santos Benavidez ng Workers’ Welfare and Protection Cluster at Assistant Secretary Lennard Constantine Serrano ng Labor Relations, Policy, International Affairs, at Regional Operations Cluster.
Nakiisa rin sa okasyon ang mga kinatawan mula sa pamahalaan, mga organisasyon ng manggagawa at employer, pribadong sektor, akademya, civil society organizations, at mga development partners.”
